!!!!!!!!!!!!!!!!!!!!!!

Evrópuréttareinkunn komin í hús................................................!
Dadaaraddada JUST SINGING IN THE RAIN....AND I´M HAPPY AGAIN
Með nokkru stolti get ég sagt ykkur að ég náði.

Ekki riðið við einteyming....

Forsætisráðherra virðist ekkert ráða við flokksmenn sína. Ekki er langt síðan hann lýsti sig andvígan inngöngu í ESB og kallaði það nýlenduveldi (ég var sammála því)
Gengur hann og þessi fjarandi flokkur hans ekki á öllum? Hvernig dettur mönnum í hug að rugga bátnum með jafneldfimu máli og innganga Íslands í ESB er, þegar öldurnar eru þegar við það að sökkva bátnum.
Fyrir svo utan það hvað innganga í sambandið hefur ótrúlegar afleiðingar fyrir okkur öll.
Endemis....
Nóg er ég búinn að læra um Evrópurétt til að vita að við verðum eitt agnarlítið peð sem ekkert vægi hefur við ákvarðanir og lagasetningar sambandsins.
Lög ESB ganga framar lögum aðildarríkjanna og hver einasta reglugerð sem Ráðið setur gengur sjálfkrafa inn í landsréttinn og víkur honum til hliðar ef hann stangast á við nýja reglugerð eða tilskipun. Ef sambandinu dettur í hug á síðari stigum að betra sé að breyta hugsanlegum inngöngusamningi okkar t.d hvað varðar fiskveiðar og aðrar náttúruauðlindir á þann veg að öll aðildarríkin eigi jafnan aðgang að þessum auðlindum okkar, þá höfum við einfaldlega ekkert um það að segja því við verðum ekki fullvalda lengur. Samningar eru nefnilega þess eðlis að þeir eru ekki eilífir. Það er hægt að segja þeim upp, rifta þeim eða breyta - eða einfaldlega setja ný lög á þá.
Og það verður einhliða í þessu tilfelli.
Miklu nær væri að útfæra EES samninginn betur að sambandinu og víkka gildissvið hans, því þar höfum allavega svolitla flóðgarða til varnar litla landinu okkar, þó þeir séu lekir. EES samningurinn hleypir okkur að innri mörkuðum ESB án þess að við afsölum okkar fullveldinu og einkarétti okkar t.d til fiskveiða og landbúnaðar.
Við búum við svokallaðan dualisma hér sem þýðir að engir þjóðréttarsamningar taka gildi fyrr en við höfum innleitt þá í landsrétt. Það þýðir að Alþingi íslendinga verður að fjalla um málið og samþykkja þá sem lög áður en kemur að gildistöku. Þetta er hálmstráið sem við verðum að halda í. Reyndar er EES samningurinn ekki venjulegur þjóðréttarsamningur þar sem okkur ber að túlka lögin okkar í samræmi við ESB reglugerðir. Við höfum samt ekki afsalað fullveldinu með aðild að EES en þjóðir sem ganga í ESB afsala fullveldinu til sambandsins. Meira að segja stóru ríkin eins og Þýskaland o.fl. eru ekki fullvalda ríki.
Ég lýsi frati á inngöngu í ESB

Hux.....

Spurningin um að hafa eitthvað að stefna að, því ef þú veist ekki hvert þú ert að fara, hvernig ætlarðu þá að vita hvenær þú ert villtur?

Hvað sem þig kann að henda, þá láttu þér aldrei gleymast, að þú ert ekki bundinn við að fara götuna sem þú valdir. Þér er frjálst að leita uppi aðra leið, ef þú finnur að þú ert að villast.

Gott vegarnesti

Ný krækja...

og mjög spennandi á sælkerasíðunni.
Lítur vel út.

Sammála..........

Séra Örn Bárður Jónsson ritaði í grein á vefsíðu sinni:
“Sem trúuðum manni þykir mér þurfa mikla trú til þess að hafna Guði og þætti hans í sköpun alls sem er. Trú mín er að tilveran sé merkilegri en svo að hún geti hafa orðið til án hugsunar”.

Verð að taka undir þetta heilshugar enda trúin mér í blóð borin.
Hitt er svo annað mál að oft hef ég rekið í rogastans þegar ég hef heyrt fólk hafna þróunarkenningunni algerlega og neita því að þróun hafi átt sér stað (tek fram að ég aðhyllist ekki allar þær kenningar en margar) . Ganga jafnvel svo langt að afneita tilveru risaeðlanna sem voru hér á jörð. Hvað gera þessir einstaklingar þegar þeir standa andspænis beinagrind risaeðlu, sem eru margar til!
Er hægt að segja: Þetta er ekki til? Var þá kannski Geirfuglinn ekki heldur til?

Svona þröngsýni á lífið er ekki til framdráttar trúnni. Þetta heitir öðru fremur afneitun og í sumum tilellum einfeldni. Hvernig eru þá orðin til ýmis kúaafbrigði, svína, hænsna, hesta, hunda. Mannkynið er ekki einu sinni eins (sumir hvítir, aðrir svartir eða rauðir eða gulir, háir og lágir) o.s.frv.
Vísindin eru ekki óvinur trúarinnar, heldur leiða þau okkur að sameiginlegum punkti – sem betur fer.
Sköpunarsagan meira að segja fer saman við vísindin......? Sjö dagar sköpunarsögunnar er eins og efnisyfirlit gríðarlega langrar sögunnar. Einn dagur sem þúsund ár og þúsund ár sem dagur einn. Guð er eilífur. Tíminn er afstæður, tímamæling er í raun búin til af mannfólkinu. Vísindaleg saga jarðarinnar fer vel saman við sköpunarsögu Biblíunnar – ef vel er gáð. Upphafið auðn og tóm, jörð rís úr hafi, plöntur verða til, síðan skriðkvikindin (þ.m.t. risaeðlurnar) og svo spendýrin. Að lokum maðurinn.....!
Styður hvort annað.
Í raun eru vísindin smátt og smátt að sanna sköpunarsöguna.
Kannski byrjaði þetta allt með einum miklum hvelli......fingursmelli Guðs......en það var klárlega úthugsuð risa áætlun að baki hvellnum

Eða hvað heldur þú?

Dýrmætt samfélag.

Við vorum að koma að norðan. Vorum auðvitað á Akureyri. Þar eigum við mikla dýrgripi. Sara Ísold var eins árs þ. 15. sl. og var nú haldið uppá það með pomp og prakt um helgina. Hrund fór norður á miðvikudaginn, flaug í vitlausu veðri. Við Erla keyrðum aftur á móti norður á föstudaginn. Það var nú hálf skrautleg ferð. Það sprakk í ofanverðum Norðurárdal. Eftir mikið basl við að ná dekkinu undan og síðan að ná varadekkinu undan bílnum komst ég að því að það má ekki aka nema mjög hægt með varadekkið undir því það er svo lítið, það gerir spennu á drifbúnaðinn en bíllinn er með sídrifi. Það var því keyrt yfir Holtavörðuheiðina á miklu slowi, enduðum á Borðeyri þar sem unglingur reddaði okkur dekki að láni þar sem dekkið okkar var ekki bara sprungið heldur ónýtt. Ég mátti síðan skila því á leiðinni til baka frá Akureyri ef ég finndi dekk þar. Þetta kallar maður almennilegheit. Fátítt í dag. Mæli með verkstæðinu á Borðeyri. Ferðalagið endaði í 8 tímum sem er met - í tímalengd norður.
Íris og Karlott lentu líka í veseni því bíllinn þeirra bilaði eitthvað og þau þurftu að snúa við og fá ökutæki lánað. Kiddi kletturinn lánaði þeim bíl, almennilegur eins og hans er von. Takk fyrir það Kiddi minn.
Það var gaman að eyða helginni saman öll fjölskyldan. Danía Rut og Petra Rut nutu sín en þær eru mjög hrifnar af hvor annarri (oftast) og gaman að sjá þær faðmast af hrifningu þegar þær hittast.
Við fengum ekki að sjá slotið hennar Eyglóar. Hún ætlar ekki að sýna okkur það fyrr en hún er flutt inn. Kíktum samt á blokkina hennar, hún lítur vel út. Ég ætlaði að vera miklu duglegri að lesa en ég var, samfélagið freistaði of mikið. Ég verð bara því duglegri við lesturinn hér heima næstu daga en það er miðannarpróf á fimmtudaginn í refsirétti.
Evrópuréttarprófið var á fimmtudaginn síðasta ---- Það var jú jú þungt próf fyrir minn smekk, gekk samt bærilega (þangað til annað sannara reynist).
Njótið daganna gott fólk.

Rakst á þessa.....

ágætu sögu og ákvað að miðla henni með ykkur.

Hvað gerir þú við tímann?? Ég lifi góðu lífi, sagði fiskimaðurinn. Ég sef frameftir á morgnana, fiska dálítið, leik mér við börnin mín, tek "siesta" með konunni, rölti niður í þorpið á kvöldin og fæ mér vínglas.
Ég get gefið þér góð ráð sagði Reykvíkingurinn. Ég er ráðgjafi með MBA frá Háskólanum í Reykjavík. Þú átt að veiða meira. Þá færð þú meiri afla og getur keypt þér stærri bát og þá veiðir þú enn meira. Síðan getur þú keypt heilan flota af bátum og þá ertu ekki lengur háður því að selja í gegnum milliliði en getur verslað beint við verksmiðjurnar, sett upp verksmiðjur og jafnvel ráðið markaðnum. Þá þarftu ekki lengur að búa hér heldur geturðu flutt suður.
Hvað tekur þetta langan tíma? spurði fiskimaðurinn. Svona 20-25 ár.
En hvað svo? spurði fiskimaðurinn. Þá kemur stóra stundin, sjáðu til. Þú breytir fyrirtækinu í hlutafélag og ferð með það á verðbréfamarkað og selur það síðan og stendur uppi með marga milljarða. Já, sagði fiskimaðurinn.... en hvað svo?
Reykvíkingurinn varð dálítið hugsi en sagði síðan: Þá flytur þú bara í lítið fiskiþorp, sefur fram eftir á morgnana, fiskar dálítið, leikur við börnin, tekur "siesta" með konunni og röltir á kvöldin niður í þorpið og færð þér vínglas.

Þannig var nú það, aldeilis athyglisverð sannindi þetta.

Eins árs.....

Ótrúlegt, en það er komið ár síðan við sáum hana fyrst. Sara Ísold hefur fyllt fyrsta árið. Til hamingju litla fegurðardís.
Hlakka til að hitta ykkur öll um helgina.

Stelst til þess í pásum....

Ég hef verið að hnýta flugur í lestrarpásum, fyrir sumarið. Góð hvíld í því. Þetta er mjög skemmtilegt, maður einhvernveginn dettur niður á árbakkann meðan maður hnýtir, kemst í veiðihug. Það virðist sem fleiri og fleiri séu að fá áhuga á veiðimennsku. Ég er ánægður með það, því þetta er eitt besta og heilbrigðasta sport sem til er, útivist, tenging við náttúruna, góður matur og frábær aftenging frá stressi og hraða. Nú er ég orðinn svo ánægður með flugurnar mínar að ég er að hugsa (huxa) um að bæta link við síðuna mína sem verður svona veiðilinkur. Ætla að setja þar ýmislegt sem viðkemur veiði, myndir af flugunum mínum og afla og auðvitað frægðarsögur, ásamt krækjum á góða veiðivefi kannski.

Mottó veiðimannsins: Sumarið er tíminn.

Góð helgi..

Helgarnar eru góðar. Þær líða hratt. Það var þorrablót um helgina hjá Erlu fjölskyldu.
Þorramaturinn er að mínu viti góður.....flestur. Ekki eru nú allir sammála því.
Það var gaman að hitta skemmtilegt fólk og borða góðan mat – góð blanda.
Allt góðir vinir mínir - reyndar bestu vinir mínir – á reyndar nokkra fleiri bestu, en fáa.

Það er gott að eiga vini.

Þessar ljóskur..

Three blondes were driving down the highway trying to get to Disneyland. They saw a sign that read "Disneyland Left" So they went home...... :-)

Master.....eður ei?

Ég var í gær á fundi í skólanum þer sem nemendum var kynnt ný meistaradeild Háskólans í Reykjavík. Það verður boðið uppá mjög metnaðarfullt nám til mastersgráðu næsta vetur. Laganemum býðst þarna tækifæri að sérhæfa sig á ýmsum sviðum lögfræðinnar. Um er að ræða nýmæli í laganámi, við erum brautryðjendur. En leiðin hefur verið sú að menn hafa tekið fimm ár í HÍ og endað námið með embættisprófi.
Ég verð að segja að þetta lítur ekki illa út svona á blaði (kennsluskrá) allavega http://www.ru.is/template2.asp?PageID=345&NewsID=1121 og ekki alveg laust við að vera spennandi að bæta þessu við.
Það á hinsvegar eftir að koma í ljós hvort ég þarf, eða finnst ég þurfa, að taka masterinn eður ei.
Þarf að skoða nokkra veigamikla þætti sem ráða miklu um það.
Nú er prófalestur byrjaður enn einu sinni, er á kafi í lestri Evrópuréttar fyrir miðannarpróf. Er kannski að hugsa um að sérhæfa mig í honum......(líklegt)

Eigið góðan dag

“Það er nú eitthvað bogið við þetta”......

sagði gamli maðurinn...... og horfði á sjóndeildarhringinn.
Það vekur furðu mína að nú þegar friðarverðlaunahafinn Yasser Arafat er allur, virðist allt vera að falla í ljúfa löð þar austurfrá. Sú kenning að hann hafi fyrst og fremst verið hryðjuverkamaður fær einhvernveginn byr við þessi tíðindi. Líklega var hann ekki allur sem hann var séður.
Allt um það þá er fagnaðarefni að nú skuli loksins eiga í alvöru að ýta friðarferlinu af stað aftur. Ísraelar og Palestínumenn verða einhvernveginn að læra að lifa saman. Vonandi tekst það í þetta sinn.

Sunnudagsþanki

Eina sem heyrist er gutlið í uppþvottavélinni og smá, en hækkandi, vindgnauð. Það spáir stormi hér á höfuðborgarsvæðinu. Ég er svo skrítinn að finnast það alltaf spennandi þegar náttúruöflin byrsta sig. Naut mín mjög í björgunarsveitinni í gamladaga þegar maður fékk alltaf að vera í mestu látunum þegar eitthvað gekk á.

Hér til hliðar er komið þetta flotta slideshow af fólkinu mínu. Það er hægt að smella beint á mynd hvers og eins og fara þannig inn á síðu þess sem smellt er á. Íris mín, litli tölvusnillingurinn minn gerði þetta fyrir mig. Thhaaaakkk fyyyyrriirr.

Enn bætist við ritsnillinga á bloggheimum. Karlott tengdasonur minn er farinn að tjá sig á netinu. http://karlott.blogspot.com/ Endilega kíkið á síðuna hans.

Erla og yngsta eru í Kringlunni (gaman) svo ég er einn heima og “á að vera að læra”.
Það styttist í alvöruna því nú eru aðeins tíu dagar í fyrsta miðannarpróf og það í Evrópurétti...kyngj.
Það er held ég erfiðasta fag sem ég hef verið í til þessa í náminu. Ég held ég muni aldrei nota þetta fag neitt en það er svo sem gott að vita hvernig kerfið virkar innan ESB og EES. Hljómar spennandi.... eða hvað?

En ég ætlaði nú ekki að skrifa um þetta heldur ætlaði ég að velta upp spurningunni hversvegna bloggar maður.
Sumir halda því fram að blogg sé sýndarmennska eða athyglissýki, segja jafnvel að blogg sé lágkúra....? Hef samt svolítinn grun um að þeir hinir sömu skoði bloggsíður eins og aðrir, kannski svipað og með Omega....eru bara að fletta.
Svo eru aðrir sem hafa gaman af þessu og flakka á milli síðna og fylgjast með hvað fólk er að hugsa og segja.
Hvað sem fólki kann að þykja um þetta þá er víst að þetta er vinsælt hjá landanum og reyndar út um allan heim.
Nærtækast er auðvitað að líta í eigin barm og kryfja hvað þar er að baki.
Ég hallast að þeirri skoðun að hjá mér sé þetta fyrst og fremst leikur, ásamt þörfinni að segja hvað innra með mér býr. Tjáningarþörfin er manninum meðfædd. Að koma skoðunum sínum á framfæri er sennilega líka meðfætt. Það blundar undir niðri, ég vil að aðrir hafi sömu skoðun og ég, þess vegna tjái ég mig.
Síðast en ekki síst færir bloggið fjölskylduna nær hvort öðru en eins og flestir lesendur þessarar síðu vita, á ég nokkra augasteina norður á Akureyri :-)
Að hafa gaman af lífinu er svolítið sem allir ættu að keppast að. Að hafa gaman af bloggi er hluti af því. Einfaldlega af því að þetta er orðinn einn hlutinn af nútímalífi.
Við lifum á tölvuöld.

B.t.w. er búinn að virkja sælkerasíðuna.

Fleiri bloggarar !

Og enn bætast við ritsmiðir. Nú er svo komið að öll fjölskyldan er komin
inná bloggheima. Íris er loksins búin að smíða sér síðu http://iriserlingsdottir.blogspot.com/ þar sem hún ætlar að tjá lesendum sínum hvað á daga hennar drífur. Það verður gaman að fylgjast með þér á þessum vettvangi Íris mín.
Ég hlakka til.

Kom að því.....!

Nýr stórbloggari hefur litið dagsins ljós. Erla mín hefur nú þeyst inná ritvöllinn.
Hún leggur af stað með trompi þar sem hún ætlar að hefja baráttu við nokkur aukakíló í beinni, sem eiga að vera farin eftir 125 daga u.þ.b.
Þetta er linkur á síðuna hennar http://www.blog.central.is/erlinga
Erla mín, hlakka til að fylgjast með flottu síðunni þinni.

Hún blómstrar konan.

Njótið vel vinir og verið dugleg að hvetja hana áfram.

Smá skoðanakönnun.

Flestum þykir gott að borða góðan mat. Ég er allavega mikill matarunnandi. Svo mikill að ég elda gjarnan frekar en að eftirláta konunni minni það......??? Í gegnum tíðina hef ég oft prófað mig áfram með ýmisskonar uppskriftir sem eru í raun ekki til nema í kollinum á mér.
Ég var að velta fyrir mér hvort áhugi væri fyrir því að ég setti upp sælkeralink hér á síðunni þar sem ég deildi með ykkur á aðgengilegan hátt þessum uppskriftum og kannski fleirum. Sumt er bara hversdags en annað spari.

Á ég að setja þennan link upp?

Hvrineg lsýt þér á njýu sðníua mnía?

Svmkmaæt rnsanókn við Cmabridge hkóásla þá stkpiir ekki mlái í hðvaa röð stfiar í oðri eru, það enia sem stikipr mlái er að frtsyi og stíasði stinaufrn séu á rtéutm satð. Aillr hniir safitarnir gtea vireð í aöljrgu rlgui en þú gtuer smat lseið það aðvuledlgea. Áæðsatn fiyrr þsesu er að mnnashgrniuun les ekki hevrn satf friyr sig hleudr oirðð sem hiled.

Mrekliget að þttea er avelg satt.

Og enn gerast tíðindi....!

Eygló mín "deildarstjóri" er komin í hóp íbúðareigenda...! Það er stoltur pabbi sem tilkynnir það. Hún hringdi áðan og sagði okkur að skrifað hefði verið undir pappírana í hádeginu í dag.
Glæsileg íbúð í höfuðstað norðurlands sem hún hefur fest kaup á. Hún stendur sig með miklum sóma stelpan. Innilega til hamingju með þetta Eyglóin mín og Guð blessi þér nýtt heimili.

Hlakka til að sjá slotið.