Eins árs.....

Ótrúlegt, en það er komið ár síðan við sáum hana fyrst. Sara Ísold hefur fyllt fyrsta árið. Til hamingju litla fegurðardís.
Hlakka til að hitta ykkur öll um helgina.

Stelst til þess í pásum....

Ég hef verið að hnýta flugur í lestrarpásum, fyrir sumarið. Góð hvíld í því. Þetta er mjög skemmtilegt, maður einhvernveginn dettur niður á árbakkann meðan maður hnýtir, kemst í veiðihug. Það virðist sem fleiri og fleiri séu að fá áhuga á veiðimennsku. Ég er ánægður með það, því þetta er eitt besta og heilbrigðasta sport sem til er, útivist, tenging við náttúruna, góður matur og frábær aftenging frá stressi og hraða. Nú er ég orðinn svo ánægður með flugurnar mínar að ég er að hugsa (huxa) um að bæta link við síðuna mína sem verður svona veiðilinkur. Ætla að setja þar ýmislegt sem viðkemur veiði, myndir af flugunum mínum og afla og auðvitað frægðarsögur, ásamt krækjum á góða veiðivefi kannski.

Mottó veiðimannsins: Sumarið er tíminn.

Góð helgi..

Helgarnar eru góðar. Þær líða hratt. Það var þorrablót um helgina hjá Erlu fjölskyldu.
Þorramaturinn er að mínu viti góður.....flestur. Ekki eru nú allir sammála því.
Það var gaman að hitta skemmtilegt fólk og borða góðan mat – góð blanda.
Allt góðir vinir mínir - reyndar bestu vinir mínir – á reyndar nokkra fleiri bestu, en fáa.

Það er gott að eiga vini.

Þessar ljóskur..

Three blondes were driving down the highway trying to get to Disneyland. They saw a sign that read "Disneyland Left" So they went home...... :-)

Master.....eður ei?

Ég var í gær á fundi í skólanum þer sem nemendum var kynnt ný meistaradeild Háskólans í Reykjavík. Það verður boðið uppá mjög metnaðarfullt nám til mastersgráðu næsta vetur. Laganemum býðst þarna tækifæri að sérhæfa sig á ýmsum sviðum lögfræðinnar. Um er að ræða nýmæli í laganámi, við erum brautryðjendur. En leiðin hefur verið sú að menn hafa tekið fimm ár í HÍ og endað námið með embættisprófi.
Ég verð að segja að þetta lítur ekki illa út svona á blaði (kennsluskrá) allavega http://www.ru.is/template2.asp?PageID=345&NewsID=1121 og ekki alveg laust við að vera spennandi að bæta þessu við.
Það á hinsvegar eftir að koma í ljós hvort ég þarf, eða finnst ég þurfa, að taka masterinn eður ei.
Þarf að skoða nokkra veigamikla þætti sem ráða miklu um það.
Nú er prófalestur byrjaður enn einu sinni, er á kafi í lestri Evrópuréttar fyrir miðannarpróf. Er kannski að hugsa um að sérhæfa mig í honum......(líklegt)

Eigið góðan dag

“Það er nú eitthvað bogið við þetta”......

sagði gamli maðurinn...... og horfði á sjóndeildarhringinn.
Það vekur furðu mína að nú þegar friðarverðlaunahafinn Yasser Arafat er allur, virðist allt vera að falla í ljúfa löð þar austurfrá. Sú kenning að hann hafi fyrst og fremst verið hryðjuverkamaður fær einhvernveginn byr við þessi tíðindi. Líklega var hann ekki allur sem hann var séður.
Allt um það þá er fagnaðarefni að nú skuli loksins eiga í alvöru að ýta friðarferlinu af stað aftur. Ísraelar og Palestínumenn verða einhvernveginn að læra að lifa saman. Vonandi tekst það í þetta sinn.

Sunnudagsþanki

Eina sem heyrist er gutlið í uppþvottavélinni og smá, en hækkandi, vindgnauð. Það spáir stormi hér á höfuðborgarsvæðinu. Ég er svo skrítinn að finnast það alltaf spennandi þegar náttúruöflin byrsta sig. Naut mín mjög í björgunarsveitinni í gamladaga þegar maður fékk alltaf að vera í mestu látunum þegar eitthvað gekk á.

Hér til hliðar er komið þetta flotta slideshow af fólkinu mínu. Það er hægt að smella beint á mynd hvers og eins og fara þannig inn á síðu þess sem smellt er á. Íris mín, litli tölvusnillingurinn minn gerði þetta fyrir mig. Thhaaaakkk fyyyyrriirr.

Enn bætist við ritsnillinga á bloggheimum. Karlott tengdasonur minn er farinn að tjá sig á netinu. http://karlott.blogspot.com/ Endilega kíkið á síðuna hans.

Erla og yngsta eru í Kringlunni (gaman) svo ég er einn heima og “á að vera að læra”.
Það styttist í alvöruna því nú eru aðeins tíu dagar í fyrsta miðannarpróf og það í Evrópurétti...kyngj.
Það er held ég erfiðasta fag sem ég hef verið í til þessa í náminu. Ég held ég muni aldrei nota þetta fag neitt en það er svo sem gott að vita hvernig kerfið virkar innan ESB og EES. Hljómar spennandi.... eða hvað?

En ég ætlaði nú ekki að skrifa um þetta heldur ætlaði ég að velta upp spurningunni hversvegna bloggar maður.
Sumir halda því fram að blogg sé sýndarmennska eða athyglissýki, segja jafnvel að blogg sé lágkúra....? Hef samt svolítinn grun um að þeir hinir sömu skoði bloggsíður eins og aðrir, kannski svipað og með Omega....eru bara að fletta.
Svo eru aðrir sem hafa gaman af þessu og flakka á milli síðna og fylgjast með hvað fólk er að hugsa og segja.
Hvað sem fólki kann að þykja um þetta þá er víst að þetta er vinsælt hjá landanum og reyndar út um allan heim.
Nærtækast er auðvitað að líta í eigin barm og kryfja hvað þar er að baki.
Ég hallast að þeirri skoðun að hjá mér sé þetta fyrst og fremst leikur, ásamt þörfinni að segja hvað innra með mér býr. Tjáningarþörfin er manninum meðfædd. Að koma skoðunum sínum á framfæri er sennilega líka meðfætt. Það blundar undir niðri, ég vil að aðrir hafi sömu skoðun og ég, þess vegna tjái ég mig.
Síðast en ekki síst færir bloggið fjölskylduna nær hvort öðru en eins og flestir lesendur þessarar síðu vita, á ég nokkra augasteina norður á Akureyri :-)
Að hafa gaman af lífinu er svolítið sem allir ættu að keppast að. Að hafa gaman af bloggi er hluti af því. Einfaldlega af því að þetta er orðinn einn hlutinn af nútímalífi.
Við lifum á tölvuöld.

B.t.w. er búinn að virkja sælkerasíðuna.

Fleiri bloggarar !

Og enn bætast við ritsmiðir. Nú er svo komið að öll fjölskyldan er komin
inná bloggheima. Íris er loksins búin að smíða sér síðu http://iriserlingsdottir.blogspot.com/ þar sem hún ætlar að tjá lesendum sínum hvað á daga hennar drífur. Það verður gaman að fylgjast með þér á þessum vettvangi Íris mín.
Ég hlakka til.

Kom að því.....!

Nýr stórbloggari hefur litið dagsins ljós. Erla mín hefur nú þeyst inná ritvöllinn.
Hún leggur af stað með trompi þar sem hún ætlar að hefja baráttu við nokkur aukakíló í beinni, sem eiga að vera farin eftir 125 daga u.þ.b.
Þetta er linkur á síðuna hennar http://www.blog.central.is/erlinga
Erla mín, hlakka til að fylgjast með flottu síðunni þinni.

Hún blómstrar konan.

Njótið vel vinir og verið dugleg að hvetja hana áfram.

Smá skoðanakönnun.

Flestum þykir gott að borða góðan mat. Ég er allavega mikill matarunnandi. Svo mikill að ég elda gjarnan frekar en að eftirláta konunni minni það......??? Í gegnum tíðina hef ég oft prófað mig áfram með ýmisskonar uppskriftir sem eru í raun ekki til nema í kollinum á mér.
Ég var að velta fyrir mér hvort áhugi væri fyrir því að ég setti upp sælkeralink hér á síðunni þar sem ég deildi með ykkur á aðgengilegan hátt þessum uppskriftum og kannski fleirum. Sumt er bara hversdags en annað spari.

Á ég að setja þennan link upp?

Hvrineg lsýt þér á njýu sðníua mnía?

Svmkmaæt rnsanókn við Cmabridge hkóásla þá stkpiir ekki mlái í hðvaa röð stfiar í oðri eru, það enia sem stikipr mlái er að frtsyi og stíasði stinaufrn séu á rtéutm satð. Aillr hniir safitarnir gtea vireð í aöljrgu rlgui en þú gtuer smat lseið það aðvuledlgea. Áæðsatn fiyrr þsesu er að mnnashgrniuun les ekki hevrn satf friyr sig hleudr oirðð sem hiled.

Mrekliget að þttea er avelg satt.

Og enn gerast tíðindi....!

Eygló mín "deildarstjóri" er komin í hóp íbúðareigenda...! Það er stoltur pabbi sem tilkynnir það. Hún hringdi áðan og sagði okkur að skrifað hefði verið undir pappírana í hádeginu í dag.
Glæsileg íbúð í höfuðstað norðurlands sem hún hefur fest kaup á. Hún stendur sig með miklum sóma stelpan. Innilega til hamingju með þetta Eyglóin mín og Guð blessi þér nýtt heimili.

Hlakka til að sjá slotið.

Enn að monta sig....!

"Nema hvað" Er spurningakeppni grunnskólanna sem fram fer um þessar mundir. Fellaskóli stendur sig vel og er búinn að vinna titilinn "hverfismeistari" og kominn í undanúrslit. Engin furða það, Hrund mín er í liðinu :-)
Hún var að koma hér inn með verðlaunaskjöld sem verður í eigu Fellaskóla. Meira um þetta á heimasíðu skólans http://www.skolatorg.is/kerfi/fellaskoli/skoli/ Reyndar frétt frá því fyrir sigurinn í kvöld. Þau unnu Breiðholtsskóla. Hér er líka önnur frétt af þessu: http://www.itr.is/
Hún er að standa sig vel stelpan.

Go Hrund, ég er stoltur af þér.

Snemma beygist krókurinn...!

Það er gaman að sjá hvernig börnin okkar mótast og verða fullorðið fólk. Hvert með sínu sniði. Þegar þau eru lítil er allt sem þau gera svo merkilegt í huga foreldranna. Það breytist ekkert þegar þau fullorðnast. Þau eru og verða alltaf börnin okkar. Þannig er það með allar stúlkurnar okkar,

Hún hefur lengi ætlað sér á þing stúlkan. Verða alþingismaður. Hún gekk í Framsóknarflokkinn í síðustu viku. Ég veit ekki hvort þetta eru fyrstu skrefin hennar á þeirri vegferð sem til Alþingis liggur. En “mjór er mikils vísir” segir máltækið.

Hrund mín var síðan í móttöku fyrir félag ungra framsóknarmanna í forsætisráðuneytinu í gær og hefur skreytt síðuna sína http://www.folk.is/hrunsla með myndum af þeirri uppákomu.
Ekki er annað að sjá en að forsætisráðherra sé ánægður með nýjan liðsmann.

Guð varði þér þá leið sem þér er ætlað að ganga Hrundin mín.

Baráttumaður

• Gafst upp á rekstri fyrirtækis 1831
• Bauð sig fram í stjórnmálum og tapaði 1832
• Gafst aftur upp á rekstri fyrirtækis 1834
• Missti unnustu sína 1835
• Fékk taugaáfall 1836
• Tapaði öðru pólitísku kapphlaupi 1838
• Tapaði þingkosningum 1843, 1846, 1848
• Tapaði þingkosningum til öldungadeildar 1855
• Tapaði baráttu um varaforsetaembætti 1856
• Tapaði kosningum til öldungadeildar 1858

Abraham Lincoln 16. forseti Bandaríkjanna 1860.

Minnir svolítið á Job.
Langaði bara að minna á þetta með mótvindinn - það lygnir.

Eigið frábæran dag

Þér eruð ljós jarðar......!

Ein ljósapera í myrkri hefur ákveðinn ljósradíus. Ef þú ert ljós í myrkri, hverjum lýsirðu þá?
Svo ótrúlega margir eru sífellt að leita að köllun sinni. Fara í skóla til að leita hennar, eru í dauðaleit að vilja Guðs með sig, en athuga ekki þau einföldu sannindi að köllunin er í kringum þá. Fólkið sem stendur þeim næst hverju sinni er vettvangurinn til að lýsa upp með kærleik birtu og yl fagnaðarerindisins. Að vera "erindrekar Krists" er auðvitað að vinna hans verk – hann dvaldi meðal syndara og tollheimtumanna, gekk um og gjörði gott.
Einfalt mál sem búið er að gera flókið.

Köllunin er nær þér en þig grunar.

Góð spurning.!

Afhverju sér maður aldrei fyrirsögnina: "Skyggn maður vinnur í Lottó" ?

Nú blæs hann........!

Það er útsynningur og stormél með honum. Notalegast er að vera ekkert að fara út á svona dögum. Ég ætla þó að fara að tygja mig. Ég ætla að skreppa til hennar móður minnar á spítalann. Síðan ætla ég að kíkja á íbúðina hans Tedda og hennar Kötu í Fellsmúlanum en þau eru búin að fá afhent – til hamingju með það krakkar.

Þeir sem ekki vita þá átti Perlan mín afmæli í fyrradag. Hún varð víst 35 ára (eftir að hún breytti kennitölunni sinni aðeins). Gott hjá henni, til hamingju með ungan aldur krúttlan mín.
Í gær hélt svo hún Hrund mín síðbúna afmælisveislu en hún varð 16 ára 8. jan. svo gærdagurinn var gestkvæmur. Til hamingju með aldurinn Hrunslan mín.
Það er skrítið að hún skuli vera orðin svona “öldruð” stúlkan – það er svo stutt síðan hún fæddist.

Annars er tíðindalítið héðan úr Vesturberginu núna. Skóli og vinna hafa tekið völdin.
En eins og máltækið segir þá eru engar fréttir góðar fréttir.

Njótið lífsins vinir.

Hvar var Paradís?

Það er ótrúlegt að hægt sé að setjast upp í flugvél og staldra þar við i nokkra klukkutíma og, barbabrella, snjórinn farinn og allt baðað í sól og sumaryl.
Þetta er nútíminn. Hugarflugið þarf ekki lengur til að upplifa pálmatré sveiflast í heitum vindi við gutlandi sjávarströnd.
Það er lyginni líkast að upplifa þetta í janúar og heyra fréttirnar að heiman um frost og funa á þorra.
Við áttum góðan tíma með vinum okkar í viku á Kanaríeyjum. Þetta eru fallegar eyjar vestur af Sahara í Afríku. Hitinn var í kringum tuttugu gráður og hressandi gola allan tímann.
Við skoðuðum okkur um og nutum okkar þó ekki væri strandarveður.
Erla er þessi týpa sem er eins og fædd þarna suðurfrá og nýtur þess framar flestum. Það skyldi aldrei vera að í æðum hennar renni spænskt blóð?? Einn veit aldrei.
Hún var allavega að njóta sín, og ég með henni.
Skólinn er byrjaður með nýjum fögum. Ætli ég þurfi ekki að taka á honum stóra mínum varðandi Evrópuréttinn til að hann gangi upp, en lýst betur á hin fögin.
Er svolítið farinn að þekkja sjálfan mig. Mér hentar betur þau fög sem innihalda einhver kerfi, stærðfræði eða verkfræði. Gengur síður með þau fög sem innihalda eintómar reglugerðir og sáttmála.
Það er gott að vera kominn heim. Krefjandi vinna framundan hjá Erlu minni en Ragnar er nú í Ameríku og dvelur þar í fjóra mánuði svo rekstur Verkvangs er á hennar herðum.
En hlutirnir leggjast vel í okkur.
Eigið góða daga.

Gott ár að baki.

Nokkrir atburðir standa upp úr. Tveir meðlimir bættust við fjölskylduna á árinu, fyrst Sara Ísold og svo Katrín Tara. Það er mikil blessun.
Einnig trónir hátt ferð okkar á Vestfirði í sumar. Þar gafst mér kostur á að skoða í fyrsta sinn bernskustöðvar mömmu, Langabotn í Geirþjófsfirði. Ævintýralegur heimur sem alltaf hefur verið ljómaður birtu bernskunnar minnar. Mamma var nefnilega vön að segja okkur sögur að vestan sem hjúpuðust ævintýraljóma í huga barnsins. Þetta var upplifun.

Laganámið hefur gengið vel þó vissulega megi segja, að ég fari ekki í gegnum það án fyrirhafnar. 104 nemendur hófu nám, en nú eru milli 65 og 70 nemendur eftir. Ég vona að þessi hópur sem eftir er haldi út og verði lögfræðingar. Þetta er sterkur hópur og framúrskarandi einstaklingar.
Það er svolítið skrítið, en gaman, að finna hvernig ný þekking safnast smám saman í sarpinn. Þekking sem vonandi á eftir að verða okkur gott fley til framtíðar á lífsins ólgusjó.

Erla hefur staðið sig með slíkum sóma á árinu í sinni vinnu að hún hefur varla við að taka við nýjum stöðuveitingum. Nú síðast í desember tók hún við starfi framkvæmdastjóra Verkfræðistofunnar Verkvangs, www.verkvangur.is eftir að hafa áður tekið við stöðu fjármálastjóra, sem hún sinnti jafnhliða skrifstofustjórastöðunni sem hún var ráðin í í byrjun. Segja má með sanni að þarna séu hæfileikar hennar metnir að verðleikum. Ég er afar ánægður með framgang hennar í vinnunni og verð að segja Ragnari til hróss að hann er naskur á starfsfólkið sitt og sér hvað í því býr. Í því felst styrkur góðs stjórnanda. Verkvangur er í stöðugum vexti enda er um að ræða frumkvöðlastarf á sviði ýmissa þátta byggingarframkvæmda.
Starfsskipti Erlu eru einhver mesta blessun sem á okkar fjörur hefur rekið.

Við Erla höfum notað tímann vel þetta árið til að rækta það sem mest er virði, fjölskylduna og hvort annað. Fjölskylduböndin eru styrk og afar fátt sem nær að hagga þeim kletti. Alltaf skýrist myndin af lífinu sjálfu og áherslum sem setja þarf hverju sinni. Verðmætamatið er kristaltær mynd, af fólki, líðan þess, sátt við náungann, Guð, góð heilsa og að lokum, hafa í sig og á. Verðmæti sem ekki eru metin til fjár, (nema kannski síðast talda).

Ekki verður með sanni á móti mælt að hópur þeirra sem við töldum vera vini okkar hefur þynnst (lífið er ekki bara sæla).
Rættist þar með hluti spádómsorða sem við fengum inn í líf okkar. Um þjónustu nokkra sem okkur var falið að inna af hendi. En þar kom fram að óvinurinn myndi snúa vinum okkar gegn okkur ef ekki findust fimm fyrirbiðjendur sem myndu biðja okkur í gegn um hremmingarnar sem á undan myndu ganga. Lífið er skrýtið. Hinn hluti spádómsorðanna er ekki enn kominn fram. Spennandi þegar það verður. Það strikar undir gildi spádómsorðanna að þessi hluti þeirra skuli rætast svo rækilega..!
Eftir stendur samt hópur sem við með sanni getum sagt að séu vinir okkar. Það eru verðmæti sem ekki verða metin til fjár og varla tekin frá okkur, úr þessu.
Ég vil nota tækifærið hér og þakka ykkur öllum sem staðið hafið gegn þessum vinafleyg óvinarins og styrkt vináttuböndin við okkur ef eitthvað er. Þið eruð perlur, Guðsgjöf til okkar.

Við erum fyrst og fremst þakklát fyrir árið sem var að líða og lítum björtum augum til nýhafins árs.
Það ber í skauti sér ný og spennandi tækifæri sem við ætlum að nýta vel.

Guð blessi ykkur öllum nýja árið.